放閃日


個人分享
Tagged With: , , , , , , , , ,

「放閃」

其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃!

「節日」

每逢二月十四情人節,好多人都會响社交媒體放閃。通常放嘅都係離唔開花,禮物,晚餐同情人。不過今年就好似等到夜晚先見到啲放閃文出現!而今年嘅情人節咁啱係農曆新年之前,好多人除咗要準備團年之外仲要忙於搞情人節。當然除咗指定嘅花同禮物之外,唔少得嘅就係要諗去邊度食飯。好多人都避免出去食飯因為一定比平時貴,所以好多人選擇係屋企自己煮!

「開心」

當然放閃唔一定係要情人節先只可以,其實一年三百六十五日都得。不過有時放閃唔一定係炫耀自己嘅幸福,其實好多時只係開心分享同紀錄嗰一刻嘅心情。有時見到其他人放閃都係開心嘅,最起碼唔係一啲負面嘅嘢。每個人都有放閃嘅時候,所以唔駛羨慕其他人嘅。唔知大家今日有無放閃呢?就算無都唔緊要,因為好快就係元宵佳節,到時又可以放過!


Also published on Medium.

Comments are closed.