大風雪


個人分享
Tagged With: , , , , , , , , ,

「落雪」

雖然以前住大連嘅時候,冬天落雪係好正常,不過真係好多年無去過落雪嘅地方。一般落雪嘅地方都會有暖氣,所以其實係室內都唔會太凍。不過一出去就會凍到變雪條!最記得有一次去芬蘭工作,因為大風雪搞到班飛機遲咗一個鐘頭先至降落,一落機先知到真係好誇張,應該係咁多年遇到嘅最大風雪。不過落雪真係好靚,白濛濛一片真係好舒服!

「行程」

估唔到今日嘅旅程會係車入面度過。本來今日嘅行程係食完早餐之後揸車去摘福岡嘅士多啤梨,然後就去食燒牛肉同行街。點知因為落大雪嘅關係,好多高速公路都封咗,搞到我哋無辦法去到鳥栖。最後我哋唯有是但搵個地方食少少嘢,然後就不斷搵其他路前往黑川。去咗咁多次日本旅行真係第一次遇到咁嘅情況,就係咁我哋第三日嘅行程就係去黑川嘅溫泉旅館。

「黑川」

去到黑川其實已經五六點,所以去到旅館無幾耐我哋就去食晚飯。不過真係好凍,去到黑川基本上好似上咗雪山咁,一片白濛濛,就連啲水都結冰。好彩條路唔係太多積雪同無結冰,不過去之前都預咗會落雪,所以租車嘅時候就已經租埋雪胎以防萬一。一如以往,郭大少一去到溫泉旅館就當咗係自己屋企咁跑嚟跑去,周圍搞嘢。不過困住咗係架車成日都真係幾悶嘅。


Also published on Medium.

Comments are closed.