牛肉乾


個人分享
Tagged With: , , , , , , , , ,

「告票」

好多人會問點解告票係香港被稱爲牛肉乾呢?其實係有原因嘅,因為係八十年代之前,一張交通違例嘅罰款告票係一式三份嘅。因為執法人員要好似罰抄咁抄三次,因此會增加抄錯牌嘅機會。所以告票入面會有一層類似過底紙嘅黑色物體。當執法人員抄完牌之後,張告票就會連埋張過底紙一齊夾係擋風玻璃嘅水撥上面。當時印刷技術比較求其,所以遠睇嘅時候就好似一塊牛肉乾咁,所以就因此得名!

「違泊」

此牛肉乾非那牛肉乾,當然就係講緊違例泊車嘅告票。點解香港咁多人會選擇違例泊車?其實問題係因為香港泊車嘅地方出現嚴重短缺,與此同時某啲地區嘅私營停車場收費昂貴,所以好多人選擇違例泊車。咁究竟提高罰款係唔係可以解決問題?其實要解決違例泊車唔係無辦法,最緊要就係適當嘅地方提供足夠嘅車位,而與此同時亦要監控私營停車場嘅收費。

「加價」

立法會係無人反對下通過提高交通違例定額罰款嘅擬議決議案。政府建議調高五項定額罰款,整體加幅為百分之二十五。其中非法進入黃格,車輛掉頭而導致阻塞,未經授權係巴士站、公共小巴站、的士站或公共小巴停車處停車,以及公共巴士、公共小巴或者的士上落乘客時停車超過所需嘅時間。以上四項違法行為嘅罰款將由三百二十蚊,調高至四百蚊。至於限制區內上落客,罰款就由四百五十蚊,增加至五百六十蚊。


Also published on Medium.

Comments are closed.