建築師

「建築」

記得中學嘅時候自己想做建築師,但係就唔記得乜嘢原因,而係外國讀書嘅時候其實係有一個星期比我哋去做工作體驗。當然嗰陣時就去咗一間建築公司返咗一個星期工,不過當然到最後都只係幫手影印文件啦。讀建築其實都幾辛苦,基本上所需要嘅時間同讀醫科差唔多,再加上經常無得瞓,所以最後都無向嚟個方向發展。其實講到尾自己都係鍾意設計多啲。

「佩服」

最近大家一定會留意到一篇關於吳彥祖嘅新聞,佢最近因為參演內地嘅真人騷《漂亮的房子》,將農村舊屋翻新改建,而佢帶領嘅團隊所設計嘅草原星空圖書館「木蘭坊」,成功入圍被稱為「建築界奧斯卡」嘅英國皇家建築師學會獎。好多人都會好驚訝,因為好多人都唔知佢原來係一位建築師。而睇返「木蘭坊」嘅設計真係好靚,有機會嘅話真係要去睇下!

「現實」

建築師需要兼備藝術家嘅審美眼光同工程師嘅力學知識,作品需要從力學角度計算,選取合適嘅工程材料才能實現。如果過於超出現實嘅材料能力限制,其實係無辦法實現為真實嘅建築。建築師嘅設計也必須能說服投資者才能付諸實現,而歷史上有好多非常有才華嘅設計,因為唔能夠完全滿足上述兩個條件而沒有機會成為真正嘅建築。所以現實係設計咗幾嘢都只係停留係設計嘅層面。


Also published on Medium.

Comments are closed.