再見了


個人分享
Tagged With: , , , , , , , , ,

「朋友」

認識你應該有二十年,因為同你哋一班朋友嘅生活唔同,其實真係好少機會一齊玩。不過唔記得點解大家有一段時間有過深層次嘅交談。雖然生活同社交圈子唔同,不過睇住你拍拖,結婚,生仔,有一個美滿嘅人生嘅時候,兩年前一個大家都會震驚嘅消息令我覺得天意弄人!好多嘢都唔明白,好多嘢都唔公平!自你開始記錄你嘅經歷,你所寫嘅每一篇文章我都有睇完。

「大愛」

人生永遠有好多嘢係我哋控制唔到,今日唔知聽日事。我經常會問點解會發生啲咁嘅事?由知道你得病我就已經唔明白,就算已經過咗兩年,我仍然唔明白!你所面對嘅一切一切係無人能夠明白!大家知道你一直好正面面對種種嘅困難,亦都知道你心底𥚃其實並不如此。自問我無你咁堅強,但係你教識咗我一樣嘢就係愛!因為愛所以你堅強,因為愛所以你勇敢面對!你永遠係大家嘅心入面,相信你會繼續守護你愛嘅人!永别啦老朋友!

「驕傲」

前幾日同另一位朋友講不如搵日打個電話俾你,因為知道未必有機會返嚟探你,點知就連打一個電話嘅機會都無了!自己都覺得自己係一個好差勁嘅朋友。雖然知道你嘅病情,或者我自欺欺人,但係因為你嘅堅強,我總係覺得你有一日可以康復!不過你終於要同我哋講再見了。大家都會為你而驕傲,因為你真係做咗一啲好多人一早就會放棄嘅嘢!我相信過去兩年你為仔仔所付出嘅佢一定感受到,亦都相信佢會因爲有你嚟嗰咁堅強嘅媽媽而自豪!希望你係世界嘅另一端繼續開開心心咁生活!老朋友上!


Also published on Medium.