叱咤獎

「回憶」

唔知大家有無留意今年嘅叱咤頒獎典禮,當然今年除咗為明日回憶之外,其實淨係睇得獎名單嘅話,對於我哋嚟班老人家嚟講,相信最熟悉嘅應該只有李克勤一個。好多而家嘅歌手如果你真係無聽開歌嘅話,相信都未必知道佢哋係邊個,甚至乎嗰啲歌聽都未聽過。而今年叱咤開始嘅時候,最驚喜嘅莫過於謝霆鋒出嚟唱咗一啲舊歌,唔知依家啲年輕人又會有啲乜嘢嘅感覺呢?

「叱咤」

每年嘅一月一號,風雨不改嘅叱咤頒獎典禮又告一段落。今年已經嚟到第三十年,而廣東歌係過去嘅三十年亦都改變咗好多。當然每個年代都有唔同嘅金曲,而你嘅金曲又會係邊首?相信睇咗叱咤咁多年都會期待林海峰個環節!今年「我的叱咤快樂時代」除咗回顧叱咤咁多年嘅片段之外,最重要嘅係搵咗陳奕迅同唱佢嘅經典金曲!錯過咗唔緊要上網隨時可以睇返!

「歌曲」

如果你問我今年十大入面最鐘意邊首歌,其實應該同大家一樣都係《長相廝守》,而另外一首係《靈感床》。兩者都有一個共通點,就係樂隊!香港近年真係多返啲樂隊出現,而好多歌嘅歌詞都好有意思。好多人以前話香港樂壇已死,但係近年其實有好多好有質素嘅歌手同組合出現,只不過其實佢哋之前係未被發掘出嚟啫。希望香港嘅樂壇可以繼續百花齊放!


Also published on Medium.

Comments are closed.