煲仔飯

「煲仔」

唔知大家鍾唔鍾食煲仔飯?如果鍾意嘅又會選擇食邊款煲仔飯?鳳爪排骨,北菇滑雞,窩蛋牛肉,鹹魚肉餅,定係傳統臘味煲仔飯呢?要成為一煲好食嘅煲仔飯係需要以下嘅條件!煲仔飯講求飯粒分明,入口要有豐富嘅油香味,帶少許焦而唔燶嘅飯焦,在配以精選配料同醬油,咁就令煲仔飯美味又鮮香。配料宜挑選一啲油脂較重,咁樣就能夠讓部分油脂滲入飯粒,吃起嚟又唔會太過乾身。

「冬天」

一到冬天就已經好想食煲仔飯,因為暖笠笠,香噴噴,尤其係啲臘味,真係好鬼好食。當然而家要搵炭燒煲仔飯係相對比較難嘅事,因為而家絕大部份嘅煲仔飯都係用煤氣爐多。不過如果你食過炭燒嘅煲仔飯就會發覺好唔同,嗰種炭燒味真係好正!不過當然煲仔飯有兩個邪惡之處就係,高脂高鹽同飯底多油!而臘腸含肥豬肉,潤腸含豬潤,兩者皆高脂高鹽,每煲臘味煲仔飯熱量超過一千卡路里。

「搵食」

如果問大家香港邊間煲仔飯最好食嘅話會係邊間呢?其實每年好多雜誌都會用煲仔飯嚟做題材,而家有時有啲人會自己係屋企整煲仔飯,不過係屋企整嘅始終無外面整嘅咁好食。以前住係港島通常都係去銅鑼灣或者筲箕灣食,因為有兩間都比較出名嘅煲仔飯。其實好多時去食一次就已經知道係龍定鳳,但係通常好食嘅環境都係一般,所以會快快食完快快走。


Also published on Medium.

Comments are closed.