質疑過


個人分享
Tagged With: , , , , , , , , ,

「質疑」

你曾經有無質疑過自己嘅能力?當然好多時我哋都會高估或者低估咗自己嘅能力,當然成功係需要靠好多唔同嘅因素,但係到最後都係要靠自己嘅能力先至可以達成目標。以前會經常同自己嘅團隊講千祈唔好質疑自己嘅能力,因為無嘢係無可能。所以要成功其實首先要相信自己唔好質疑自己嘅能力,如果唔係其實一開始就已經輸咗!但係返咗嚟香港之後,有時自己都唔知點解會開始質疑自己嘅能力。

「能力」

創業除咗想突破之外,其實自己想證明就算由零開始,無一個國際品牌作後盾,究竟自己可唔可以用以前所學嘅嘢再闖一番事業!但係有時又會質疑自己,因為好似做嚟做去到好似原地踏步。究竟係自己嘅問題定係環境嘅問題?又或者已經過咗咁多年,係唔係自己嘅心態問題?有時質疑自己唔係一件壞事,因為可以令自己檢視不足,最緊要嘅係唔好失去信心,繼續堅持自己嘅信念。

「相信」

或者以前打工真係比較簡單,因為只係專注自己做嘅嘢,好多週邊嘅問題會有其他人去解決。但係當你自己做生意就好多時都會一腳踢,無幾耐就覺得自己經驗唔夠,最後都係去打工攞經驗。當然除咗自己會質疑自己嘅能力之外,其實好多時都會俾其他人質疑自己。雖然有時係會唔開心,但係最緊要嘅係自己知道自己係有咁嘅能力。事實勝於雄辯,所以無需要理會其他人嘅睇法,最緊要係自己相信自己!


Also published on Medium.

Comments are closed.