簡單化

「分析」

要令大家簡單明白數據分析係啲乜嘢其實係一件比較難嘅事。因為要配合好多方面嘅嘢先至可以發揮到數據嘅真正價值。諗咗好耐其實都未諗到點樣先至可以簡單咁解釋一啲咁複雜嘅嘢。數據真係一樣好虛無縹緲嘅嘢,經常講數據唔係一樣實體嘅嘢,但係偏偏係一樣每個人每日都會接觸到嘅嘢。就算你有數據都好,係唔係有用係一個問題,因為數據係一個因果嘅關係。

「簡單」

如果真係要好簡單咁講乜嘢係數據分析,我諗係咁。首先係產生,收集,整理,分析,測試,結果。複雜嘅地方係每一個環節都需要唔同程度嘅技術支援。數據嘅來源係來自用家,而收集啲乜嘢數據係在乎用途。當數據太過凌亂嘅時候就需要整理,然後先至可以有效咁用嚟分析。之後不斷反覆測試分析出嚟嘅結果,務求達到最終嘅目的。只不過有時現實係要做好多嘢先至可以做到以上六點。

「數字」

當然數據係大有大做,細有細做,只要係有用嘅數據都會俾到一啲有用嘅嘢你。首先要明確知道點解要用數據,而且要確保數據來源嘅可信性。如果源頭已經受到污染,咁之後嘅所有分析其實都係白做!只不過好多人都低估咗一啲技術性嘅問題,所以有時太過簡單化或者可以話有少少誤導。做數據分析係要終根究柢,雖然無可能做到百分百準確,但係至少要明白因果,如果唔係對大家嚟講只係一堆數字。

(Visited 11 times, 1 visits today)

Also published on Medium.