歸屬感


個人分享
Tagged With: , , , , , , , , ,

「心理」

小朋友最大嘅心理渴望就係同父母連接嘅歸屬感!而呢樣嘢係超越咗所有事物嘅渴望!咁小朋友係透過啲乜嘢方式同父母連接嘅呢?其實好簡單,就係佢哋想做父母所做嘅事。如果一家人一齊做嘅話,小朋友就會覺得佢哋係同父母一齊,而呢樣就係佢哋所需要嘅歸屬感。小朋友難以忍受嘅係父母其中一方否定另一方,那好似自己嘅一半否定另一半一樣,結果造成小朋友心理上嘅分裂。

「歸屬」

歸屬感對於一個小朋友係好緊要,除咗佢哋自己得到認同之外,其實父母雙方亦都要認同大家。如果小朋友無咗嚟份歸屬感嘅話係會影響佢哋嘅一生。小朋友係希望同父母有一個緊密嘅關係,而無可否認嘅係佢哋一半係嚟自爸爸,一半係嚟自媽媽。所以佢哋會用盡方法去同父母連繫而得到佢哋心理所需要嘅歸屬感。所以除咗要稱讚自己嘅小朋友之外,父母亦都要互相稱讚對方,咁樣先可以滿足小朋友心中對歸屬感嘅渴望。

「深層」

如果媽媽經常常話爸爸唔好,唔認同同爸爸,小朋友會因為希望同爸爸有連繫,佢哋會採取強烈嘅方式去處理,就係同爸爸做一模一樣嘅嘢。只不過因為媽媽唔容許,表面上係會聽媽媽講,而實質上私底下會似爸爸,甚至乎潛意識跟隨著爸爸嘅命運。所以當我哋否定自己嘅另一半嘅時候,究竟我哋係度俾緊啲乜嘢嘅訊息佢哋呢?一個人同佢嘅家庭有千絲萬縷嘅聯繫,而嚟種聯繫有可能影響佢哋嘅一生。


Also published on Medium.

Comments are closed.