慶中秋


個人分享
Tagged With: , , , , , , , , ,

「過節」

今年真係好似無乜嘢過中秋嘅心情,雖然係自己嘅農曆生日,但係諗起以前細個同屋企人過中秋,心情又再一次低落。前嗰排先至講緊中秋節去邊度做節,真係無諗過今年會少咗爺爺同我哋一齊過。其實有時唔知點解會記得以前細個時候嘅嘢,因為真係好細個,應該係無乜記憶,但係就記得大家會上屋企嘅天台慶祝,玩燈籠。或者開心嘅嘢真係會記得一世,就算幾細個都好!

「中秋」

一年容易過中秋,時間真係過得好快,真係唔知有幾多年無同個阿爸一齊過。今年因為要處理爺爺嘅事,所以難得可以三代同堂過今年嘅中秋節。今日嘅天氣真係同自己嘅心情一樣,都係天陰陰,重要落係大雨。好似真係咁多年嚟都無試過中秋節嘅天氣係咁差,就連個月光都基本上係睇唔到。不過唔緊要啦,只要一家人齊齊整整食餐飯就已經心滿意足了!

「燈籠」

上年郭大少仲未知道乜嘢係中秋節,仲未識得玩燈籠,不過今年就知道乜嘢係月餅同燈籠。希望下年天氣好啲可以同佢一齊出去賞月,玩下燈籠,不過就應該未可以玩蠟燭,始終都仲係細,有啲危險。而家啲小朋友過中秋真係同我哋細個嘅時候好唔同,啲燈籠都已經用晒電嘅。當然就安全啲,不過就唔會經歷燒燈籠搞到唔開心嘅經歷。相信好多人細過嘅時候都試唔少。


Also published on Medium.

Comments are closed.