三年了


個人分享
Tagged With: , , , , , , , , ,

「網誌」

每一年嘅生日都係自己網誌嘅週年紀念日,亦都係自己嘅生日。今年應該係過去三十幾年嚟最難過嘅生日,因為今日係爺爺嘅頭七。雖然大部份嘅嘢都應該處理好,而家只係等啲儀式,但係心情依然非常低落。雖然話係自己嘅生日,只不過自己淨係想安安靜靜咁過。今年生日只有一個願望就係可以繼續睇住郭大少開開心心咁過每一日,健健康康咁成長!

「記錄」

不經不覺寫咗三年嘢,總共一千零九十六篇文章。要堅持去每日寫確實有啲難,不過都叫做寫咗三年。其實已經開始變咗做自己一個習慣同一本日記。得閒睇番自己寫嘅嘢真係幾得意,因為記錄咗好多開心同唔開心嘅嘢。雖然未必好似以前咁日日都準時寫,但係依然會希望可以繼續堅持每日一篇。希望郭大少大咗之後可以睇返我寫過嘅嘢。

「前路」

人生咁就過咗一半,而家真係唔係十八廿二。係時候認真諗下餘下嘅人生究竟應該做啲乜?當然最希望嘅就係自己行得走得嘅時候可以帶郭太少去多啲地方,珍惜可以同佢相處嘅日子。好多嘢都唔係必然,亦都唔係理所當然。每個人行嘅路都唔一樣,最緊要係知道自己嘅方向。人大咗,包袱大咗,顧慮多咗,好多嘢都已經唔係話你想點就點。都係嗰句,活在當下!


Also published on Medium.

Comments are closed.