懷念你


個人分享
Tagged With: , , , , , , , , ,

「爺爺」

由細到大爺爺都係同我哋一齊生活,直至到我哋移民咗澳洲之後先至分開生活。但係過咗幾年之後都一齊移民咗,大家又可以經常見面,亦可以享受退休嘅生活。係我心目中你係一個好勤力,好節儉嘅人。可以嘅話都盡量唔好麻煩到其他人,好多嘢都收收埋埋唔同我哋講。你最怕嘅就係無得周圍走,但係近年身體唔好,亦都經常出入醫院,而你每次都會問幾時可以返屋企。

「懷念」

真係無諗過咁突然,突然到我都反應唔切,到而家其實都未係好接受到。真係好後悔,點解之前嗰日無去探你?今日已經用最快嘅速度趕去醫院,但係中途已經收到屋企人嘅電話。點解唔等多我一陣?最起碼等我同你講聲再見!近年你嘅身體唔好,而大家都有心理準備,但係真係無諗過你走得咁突然。爺爺,希望你一路好走,唔使擔心我哋,我哋會好好照顧嫲嫲。

「回憶」

我永遠都會記得你教過我嘅嘢,亦都記得細個同你行山同郊遊嘅日子。嚟啲係我同你之間嘅回憶,到而家我都仲好記得。你每次見到我都叫我食多啲嘢,每次去探你都叫我快啲走。其實自問真係好多嘢都無做好,之前希望可以同你一齊返鄉下,但係到最後都無同你一齊返去,而家真係再無機會了。慶幸嘅係你見到我大學畢業,見到我結婚同生咗小朋友,因為我知道嚟啲都係你嘅願望。


Also published on Medium.

Comments are closed.