港學校


個人分享
Tagged With: , , , , , , , , ,

「制度」

香港嘅教育制度真係玩死啲父母,當然係其他國家都會有類似嘅情況,只不過香港係唔係有啲太過複雜呢?就連幼稚園都已經要搞咁多嘢,真係未做人父母係唔會知道有幾變態。有時唔係你想做怪獸家長,而係不論政府又好,學校又好,都令到好多家長變成怪獸。好多人都會跑出嚟講好多嘢,但係如果唔改變根本嘅問題,其實講乜嘢都無用!

「選擇」

其實乜嘢先至叫做好嘅學校?每個父母心目中都有唔同嘅定義,要學術嘅定係要德育嘅,其實已經係差好遠。不過學海無涯,學術嘅嘢其實幾時都可以學,但係德育就真係要由細開始教。而家搵學校就同搵工一樣,唔係你揀人,而係人哋揀你。小朋友絕大部份嘅時間都係係學校,所以要搵一間適合自己其實比較緊要!如果唔配合佢嘅性格,就算間學校點出名到無用,因為根本上佢哋都未必學到嘢。

「矛盾」

當然明白每間學校都有收生標準,只係有時考學校都真係要睇彩數,有得揀就當然係好,只不過唔係個個人都有得揀。有時都真係好難兩全其美,只係希望自己嘅仔有一個愉快嘅校園生活。與此同時希望佢身邊有一個好嘅圈子,而好嘅圈子有時係要有取捨。所以做父母有時都真係幾矛盾,因為知道無可能樣樣都滿足到自己嘅要求!講到尾其實都只係為咗自己個仔啫。


Also published on Medium.

Comments are closed.