返學了


個人分享
Tagged With: , , , , , , , , ,

「開學」

每年嘅九月一號都係開學日,唔知大家仲記唔記得自己第一日返學係點?如果你問我就真係唔記得,最記得嘅就係間幼稚園園係灣仔,放學嫲嫲接我然後去坐巴士。除此之外,其實真係唔記得自己返幼稚園嘅情況。當然人生第一日返學,好多時喊係避免唔到,因為始終係第一次同屋企人分開獨自去返學。而當自己做咗人哋父母之後,見到自己個仔返學就真係有少少唔捨得。

「成長」

今日係郭大少第一日返學,雖然之前都同佢去好多唔同嘅地方上堂,但係一直都有我哋陪佢上。今日雖然係預備班,上堂嘅時間比正常短,而且學校有適應日,所以今日可以由一位家中陪同上堂。點解我哋以前返學好似無你啲所謂嘅適應期?見到郭大少著咗校服,孭住個書包,感覺真係大咗好多。眨下眼佢已經開始校園嘅生活,時間真係過得太快了,希望佢返學返得開心啦!

「獨立」

其實郭大少唔係第一次自己上堂,本來諗住佢會唔捨得我哋攬住我帶唔放,又或者爆喊。點知我哋嘅擔心完全係多餘,因為佢一入課室就顧住自己玩,完全漠視我哋離開。當然安慰嘅係佢已經可以獨立,不過就有啲失落,因為都話晒第一次自己上堂,佢竟然連一啲啲唔捨得都無。睇怕嚟個仔大個咗之後應該係會周圍去嘅人。唔知佢下星期自己返學嘅時候又會點呢?


Also published on Medium.

Comments are closed.