颱風後


個人分享
Tagged With: , , , , , , , , ,

「破壞」

真係無諗過個天鴿咁犀利,佢嘅破壞力真係驚人。當然最變態嘅就係浸咗杏花村一個地下停車場,入面啲車真係可以全部報銷。香港雖然逃過一劫,但係澳門就無咁好彩,唔單止水浸,仲造成人命傷亡。最驚訝嘅係一座豪宅嘅玻璃窗竟然吹爆晒,認真誇張!希望佢哋可以快啲回覆正常!所以真係唔好低估大自然嘅威力,亦唔好盼望打風可以放假!

「颱風」

打完風之後,係街見到天鴿嘅威力,一路渣車就見到好多樹都因為大風而折斷,一街都係斷咗嘅樹枝。不過有乜嘢變態過啱啱打完風,轉過頭又有另外一個熱帶低氣壓吹緊嚟香港。真係一波未平一波又起,而且個風嘅路徑同天鴿差唔多。本來諗住趁郭大少仲未開學之前去多次海灘,睇怕今個周末又會係狂風暴雨。雖然話就話係颱風嘅季節,但係都唔係咁密!

「運氣」

一個颱風就可以反映到一個城市嘅基建同管治問題。仲記得好幾年前睇過國家地理雜誌嘅節目,講述同模擬如果香港遇到超強颱風正面吹襲嘅話,造成嘅破壞係可以好嚴重。天文台前台長林超英亦都指出,天鴿吹襲澳門嘅強度同一九六二年嘅颱風溫黛差唔多。佢亦係社交網站表示,天鴿風眼周圍最大風嘅圓圈,其實只係僅僅係大嶼山以南掠過,香港逃過天鴿之劫純粹運氣!


Also published on Medium.

Comments are closed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Also published on Medium. Click to share on Facebook [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Also published on Medium. Click to share on Facebook [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Also published on Medium. Click to share on Facebook [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Also published on Medium. Click to share on Facebook [...]