又教完

「教書」

今年真係有大部份嘅時間都係教緊書,有時真係好佩服全職教書嘅朋友!因為教書真係挑戰聲帶嘅極限,最瘋狂嘅係一個星期教四日,有時仲要連續講七八個鐘頭嘢。其實教書真係好攰,所需要嘅體力真係唔可以低估,教完之後基本上個人只係想靜靜哋休息下。雖然之前都有返開大學教書,但係都只係一個星期一日,而且只係三個鐘,而同而家比真係覺得輕鬆!

「課程」

今日又教完一個課程,而每次教完之後都好似有一種失落嘅感覺,但係又好開心咁同自己講又完成一個課程!每次教書都只係有一個目的就係希望更多人認識網上營銷,了解背後嘅運作,同點樣運用數據去分析業務嘅重要性。要改變市場唔係一朝一日嘅事,好多時都係要從教育開始。希望大家可以學以致用,撥亂反正,唔好俾啲招搖撞騙嘅人欺騙。

「能力」

其實有時教書唔係只係教咁簡單,因為好多時都會係學生身上學到唔同嘅嘢。就好似今次嘅課程,認識咗唔同背景,唔通行業嘅人,老實講每次都有唔同嘅得著。有時自己真係無時間去睇啲數據或者啲數據只係用自己嘅角度去睇,當有其他人一齊分析同一樣嘅數據嘅時候,都會有唔同嘅得著。如果再深化佢哋嘅分析,真係會搵到好多好有用嘅。所以千祈唔好低估學生嘅能力!


Also published on Medium.

Comments are closed.