三子案

「撕裂」

香港社會點解撕裂?好明顯就係因為政府講一套做一套!嗰頭話要聆聽年輕人嘅聲音,轉過頭就要覆核刑期!一時強調法律,一時強調包容,但係就因政治立場而各有不同嘅緣故!其實都已經預咗個政府係咁,講就好好聽,而且仲大條道理,咁仲講乜嘢無政治考慮?年輕一代係社會嘅未來,一個民主嘅社會係唔應該打壓唔同嘅聲音。官逼民反,道理好簡單,何必要處處逼人?

「三子」

今次律政司主動覆核刑期,好明顯係有政治目的。雖然講就好聽其實目的係為咗要打壓班年輕人嘅聲音,所以不論係東北案定係雙學三子好明顯係要話俾下一代聽就算你幾唔妥嗰政府都唔好發聲。如果政府係有心聆聽市民嘅聲音,咁就唔會出現咁多矛盾。成日就開口埋口話法治係香港成功嘅基石,但係事實係利用法律去打壓反對嘅聲音,咁仲講乜嘢法治呢?

「打壓」

其實無人話雙學三子無犯法,而係佢哋已經被判刑之後,律政司不滿刑期而提出覆核。無人話佢哋唔承擔法律責任,只係律政司窮追猛打!究竟為乜?目的好明顯啦!相信大家唔係執著刑期,而係政府嘅態度。所以唔好混淆視聽,因為市民係不滿政府嘅態度,唔係法庭嘅判決!犯咗法,佢哋勇於承擔,亦從來無逃避過,只係政府不斷透過法治去打壓嚟啲為社會發聲嘅年輕人!


Also published on Medium.

Comments are closed.