筆記簿

「習慣」

以前做嘢好多時我都會有一本筆記簿記,多數都係寫低自己嘅諗法。唔知幾時開始嚟個習慣唔見咗!雖然自己都有幾本筆記簿,但係真係少用咗好多。本本都用唔晒,但係入面寫嘅嘢,好多到今時今日都仍然有用。有時真係貪方便,用電腦去寫低啲嘢,但係通常寫完就好少再睇返,有時甚至唔知個文件去左邊。而家啲記憶力真係好差,好多嘢都真係唔記得,我諗都係時候要拎返本筆記簿出嚟用了!

「筆記」

今時今日仲會有幾多人用緊筆記簿?仲記得啱啱出嚟做嘢,見到老闆去邊都拎住一本筆記簿,一支筆,有日我就問佢點解去邊都拎住佢?佢話好多時都有好多諗法,如果嗰刻唔寫低佢,轉個頭就會唔記得!當然以前無平板電腦,所以好多嘢真係要用紙同筆,但係而家就算有咁先進嘅科技,其實都係紙同筆好。有時睇返自己寫嘅嘢都覺得幾得意,就算你話我老餅都係咁話!

「科技」

雖然科技真係可以好方便,不過真係唔係好實在。或者真係年代唔同,又或者係個人習慣,雖然我有平板電腦,但係始終覺得無筆記簿咁好。有可能我自己鍾意畫嘢,因為畫咗出嚟可以將自己嘅諗法圖像化,令到自己可以睇得更加清楚整個畫面。今時今日仲仍然拎住一本筆記簿去開會嘅人真係越嚟越少,個個都係對住部電腦去開會,真係甚少會用紙筆。如果你今時今日依然用緊筆記簿嘅話,不妨舉舉手話我知啦!


Also published on Medium.