點講好


個人分享
Tagged With: , , , , , , , , ,

「朋友」

每次睇到一位朋友嘅網誌都百感交集,因為佢將過去一年自己抗癌嘅經歷全部紀錄落嚟。由知道佢有病開始,到佢開始寫網誌,基本上佢每次一有新嘅網誌,我都會去睇。雖然只係通過文字知道佢嘅狀況,但係已經感受到佢所經歷嘅每一件事。有時心入面真係唔好受,經常會問,點解會發生係佢身上?點解每次好似見到佢好返少少嘅時候,又會出現其他嘅問題?

「關心」

我唔係一個講嘢好叻嘅人,我亦都唔係好識得表達自己感受嘅人,所以雖然知道我嚟位朋友身體嘅情況未必係好理想,但係我好少主動去發短訊去問候吓佢。我印象中好似只係問候過佢一次。其實最主要嘅原因係我都唔知可以講啲乜嘢好,因為唔想淨係講努力,加油,保重等等咁膚淺,但係又唔知應該講啲乜好。無論係點都希望佢可以戰勝病魔,雖然係一場好難打嘅將,不過我相信就算幾難打都好,佢都會堅持到最後!

「珍惜」

好多時都會喺度諗,如果有日有事嘅係自己,我會點?世事難料,好多時好多嘢都唔係你想點就點。人生無常,好多人話珍惜眼前人,但係有幾多人真係會?有時真係唔去到生離死別嘅時候先至學會珍惜。好多嘢真係唔需要太過執著,要學識放低,因為人生有好多嘢都無得強求。如何活得開心,活得精彩,其實就已經足夠。人生實在有好多嘢都係過眼雲煙,而無嘢係緊要過自己嘅屋企!


Also published on Medium.

Comments are closed.