玩完啦

「文化」

今日係最後一日係大阪,返香港之前我哋食完早餐就同郭大少去過一個室內兒童遊戲室玩。去到嘅感覺同香港嗰啲好唔同,地方大之餘就係入面有好多唔同嘅設施比唔同年紀嘅小朋友玩。最大分別就當然係日本嘅小朋友真係同香港嗰啲好唔同,佢哋唔會好似香港啲小朋友咁玩到癲喪乜都唔理,而啲家長都會睇住自己啲小朋友,見到細個佢哋嘅小朋友都十分禮讓。嚟個就係文化嘅差異!

「旅程」

十日嘅旅程去到最後一日,七日北海道同三日大阪之旅今日就告一段落。今次嘅旅程同之前好唔同,因為郭大少再過一個星期就兩歲。而每次嘅旅程佢都會比我哋一啲新嘅驚喜。而家佢終於可以用花灑洗頭,自己用個盤裝水沖身,而且佢突然講好多嘢,越嚟越識表達自己。平時係香港唔食飯,點知去到日本連烏冬都唔要。見到自己鍾意嘅火車同巴士都超興奮!雖然係換咗個地方湊仔,但係見到佢開心就已經足夠了!

「感激」

今次十日嘅旅程都係老婆一手包辦安排晒所有行程,而今次嘅旅程真係天公造美,我哋主要嘅行程都係陽光普照!當然之前老婆好辛苦咁安排晒所有嘢,又要睇資料,又要安排衣食住行,真係要多謝佢用咗好多時間心機安排。當然最開心嘅就係郭大少,真係可以話係由朝玩到晚。雖然同小朋友去旅行係辛苦,但係見到佢去到每個地方都好好奇,好興奮,其實俾佢哋探索多啲係一件好事。正所謂讀萬卷書,不如行萬里路!


Also published on Medium.

Comments are closed.