廿三個


個人分享
Tagged With: , , , , , , , , ,

「健康」

作為父母,見到自己嘅小朋友可以健康成長就已經足夠。雖然已經踏入兩歲嘅茶煲階段,但係郭大少真係幾好笑。因為今個月無同佢返學,佢每次行過類似學校嘅嘢都想走入去,希望佢大個之後都好似而家咁,鍾意返學啦。有時真係覺得佢唔似一個兩歲都未夠嘅小朋友,尤其佢玩滑板車!因為已經識得左閃右避,重要踩得好快!有時佢食量都好驚人,一個人食晒一碗烏冬,一份厚蛋治,不過都係個句,佢鍾意食係可以食好多!

「慶祝」

仲有一個月郭大少就兩歲,今日食完晏就同佢去咗元朗新田小磡村信芯園睇向日葵。因為之前好多媒體報導所以就趁今日平日同佢去睇花。睇完花之後係門口見到花園老闆信哥,同佢傾咗兩句,佢話小朋友係佢嘅老闆,我哋應該留返啲最好嘅嘢俾佢哋。之後就去咗沙灘同佢玩沙,依家佢真係唔怕去沙灘,仲玩到好開心唔捨得走。之後就同佢去食佢最鍾意嘅烏冬然後返屋企大覺瞓!

「記錄」

有時時間過得真係好快,就連去邊度都唔記得。所以真係要好好咁記錄同郭大少去過嘅地方。今個月同佢去咗牛棚藝術村個土炮遊樂場,去咗朋友仔嘅生日會,去咗大埔睇巴士展覽,去咗海港城睇小熊學校,去咗太古城睇樂高展,去咗元朗睇向日葵,去咗海灘玩沙。因為今個月真係超級忙,好多時夜晚都出咗去教書,就連星期六都出咗去教。不過期望七月同佢去北海道旅行,因為佢返學之後應該好難去旅行了。


Also published on Medium.

Comments are closed.