被淘汰

「淘汰」

自從一九九四年開始有互聯網嘅年代就已經成為我生命嘅一部份,隨著佢嘅發展,由自己嘅對寫網站嘅興趣變成自己嘅職業,其實真係睇住科技嘅發展同不同公司嘅起起跌跌。因為互聯網發展迅速,就算係龍頭公司,有一日都會被淘汰。要生存就需要不斷調整策略同發展嘅方針,唔係大就唔會被淘汰,因為歲月不饒人,唔改革嘅話只會俾時間巨輪慢慢吞噬!

「雅虎」

雅虎終於完成使命變成歷史。作為最早期嘅搜尋引擎,基本上同而家嘅谷歌一樣,可以稱得上係早期最多人用嘅搜尋器。之後佢哋推出電郵服務,相信直至嚟刻好多人都係用緊佢哋嘅電郵系統。不過雅虎近年雖然希望求變,只不過都係逃唔過要賣盤嘅命運。當然係互聯網嘅年代係好平常嘅事,只不過一個陪伴自己成長嘅平台就咁樣變成歷史真係感到有點心酸。

「改變」

係我認識嘅朋友中,好多都係雅虎做過,相信佢哋感受更深!就好似自己見到娘家近年嘅發展,其實真係有啲擔心佢哋會再一次返到九十年代嘅困境。不過現實係殘酷,就算今日面書好似好強大,但係亦都會有可能係十年之後變成歷史。類似雅虎嘅例子真係好多,亦都唔係唔常見。所以要跟得上時代嘅發展,就要不斷改變。雖然改變未必一定成功,但係點都好過唔變!


Also published on Medium.