救地球

「氣候」

其實無人可以否定我哋生活緊嘅地球開始出現咗變化,不論係氣候甚至乎一啲嚴重嘅自然災難,其實都係因為人類不斷消耗地球嘅資源同影響自然生態,導致地球開始失衡嘅後果。所以好多國家都希望將氣候變化嘅速度減慢,與此同時攜手協力去研發新嘅能源同減少碳排放。作為地球村嘅一份子其實係好應該去保護我哋生活嘅地方,好讓我哋嘅下一代有一個更舒適嘅環境成長!

「巴黎」

巴黎協議係由聯合國一百九十五個成員國係二零一五年十二月十二日係聯合國氣候峰會中通過嘅氣候協議!希望能夠共同面對同減慢全球暖化嘅趨勢。但係作為世界第一大國嘅美國,總統特朗普今日竟然堅決宣佈脫離嚟個巴黎協議,原因係覺得其他國家係經濟上搵美國著數,多過氣候轉變。佢亦認為減少溫室氣體排放協議所要求嘅嚴苛金融和經濟負擔對美國代價太大,所以決定退出協議。

「變化」

近年相信大家都會聽到或者遇到好多所謂百年一遇嘅自然災難,而大家亦都知道如果地球繼續一步一步咁樣暖化落去,地球真係會好快玩完。有可能你話到時你已經離開咗嚟個世界,但係你又有無諗過我哋嘅下一代呢?依家特朗普基本上逐一對翻之前奧巴馬所推行嘅政策,其實真係痴線。作為一個大國嘅領袖竟然可以漠視全世界人類嘅利益真係離晒大譜!美國係國際嘅型像同影響力將會逐漸下降!


Also published on Medium.

Comments are closed.