港海灘


個人分享
Tagged With: , , , , , , , , ,

「假日」

每逢假日海灘都真係逼爆人,而自從搬咗去新界之後,可以選擇嘅海灘真係少咗好多。當然另外一個好重要嘅原因係要帶埋郭大少一齊去,所以要搵一啲有好嘅沖涼設施同個灘要大嗰啲先至得。而家每次去海灘都係同郭大少玩沙多,所以一定要帶齊佢啲玩具去同佢玩。最起碼同佢去得多海灘,佢唔怕沙,仲玩得好興奮,有時玩到唔捨得走。如果唔係太大浪嘅話,佢都唔驚咁自己走去水邊踩水!

「海灘」

近日天氣唔錯,所以又係去海灘嘅好時機!去海灘真係要一早去,如果唔係真係想搵個位泊車都無。就算搵到位泊,去到海灘真係想搵個位都難,人都到一個地步真係插針都插唔入!當然香港嘅沙灘話多唔多話少唔少,只不過有啲唔係咁啱一家大細去。唔同嘅沙灘真係有唔同嘅文化,不過真係接受唔到啲人連私人空間咁簡單嘅概念都無!其實點解啲人係都要貼住人哋個帳幕同沙灘蓆嘅呢?

「設施」

老實講香港海灘啲設施都真係嘛嘛哋,尤其係個更衣室,有時真係唔敢行入去。除咗啲去水渠通常都塞晒去唔到水之外,基本上地下好似水塘咁,沖完等於無沖咁。最慘嘅係入面啲沖涼設施又無乜保養,殘殘舊舊,有時帶個仔去沖涼都真係幾大鑊,因為感覺真係幾污糟,所以我通常都會快快手沖完身就走人。政府啲嘢真係咁上下,因為有時就連政府嘅室內游泳池都係咁。


Also published on Medium.

Comments are closed.