好鬼嬲

「好嬲」

今日真係好嬲,因為好多人都知道搵得我做嘢嘅話我一定會做好佢,但係今日再一次俾人侮辱!講真有乜嘢做得唔好我都會搞返掂佢先至完事,只不過問又唔講,無啦啦搵個高級啲嘅人同我開會話我哋做完啲嘢無用,所以唔比錢!嘩!聽到呢度真係火都嚟!如果無做嘢就話啫,但係因為嚟個項目個個做到金睛火眼,就連週末都係咁做。或者係未必得到你嘅要求,但係我哋係跟你俾嘅資料去做,真係唔好話我哋無做嘢囉!

「尊重」

我真係好怕啲人唔尊重別人所付出嘅努力。一間大公司搵我哋做嘢,開始嘅時候大家都知道係好趕,而中途因為系統有上限所以無辦法按時遞交文件。之後到質量問題,所以我哋再花好多時間嘗試去解決。喺過程入面有好多嘢係我哋控制唔到,而每當有問題我哋都會即時匯報!如果真係對我哋不滿其實可以開心見誠講。專登約一個會話因為我哋無達到要求,所以唔想俾錢!真係第一次遇到咁嘅問題!

「侮辱」

我哋都係第一次合作,你有問題可以打電話俾我直接同我講,大家可以商量對策,就算我去你公司一齊幫手搞掂佢都無問題。次次淨係話啲數唔準,叫我哋幫你搵出問題,我哋用咗成個星期都搵唔到問題。從來無提過你哋有不滿,所以唔繼續。我哋都用咗好多人力物力去做,你唔單止覺得我哋做唔到嘢,交唔到功課,甚至連我哋不眠不休幫你去做到無一聲多謝,都唔緊要。最慘嘅係你話唔比錢?如果係質量問題我會包底,只不過真係一啲尊重都無!就算係香港其中一間大嘅傳媒都係咁話,無下次!


Also published on Medium.

Comments are closed.