實體書

「電子」

曾幾何時好多人都會覺得電子書係會取代實體書,但係經過咁多年嘅發展,其實電子書其實都仲未普及。另一個問題就係應用係教育方面,因為如果依賴電子書作為教材嘅話,其實有無諗過會影響學童嘅健康?雖然引入科技係好,但係亦需要考慮健康問題。當然書簿費每年都會增加,但係電子書係唔係一個解決方法?其實推行電子教學嘅時候有無考慮到學生嘅健康同成長問題?

「實體」

唔知係係唔係我老嘅緣故,其實我真係鍾意拎住本書多過睇電子書。雖然電子書真係有好多地方都好方便,但係真係無實體書嗰種感覺。而且有時真係睇啲電子書睇得太長時間嘅話,對眼真係有啲攰!當然有好多電子書都會用一種叫做電子墨水嘅技術去模仿實體書,只不過都係嗰句,電子書無質感。雖然自己睇書係會瞌眼瞓,但係如果睇電子書嘅話,我相信我嘅集中力會更加低。所以都係實體書比較適合自己。

「浪費」

其實每次搬屋最大嘅問題就係啲實體書,因為真係好重,有時又唔捨得浪費本書。所以而家真係少咗買書除非真係有必要先至會買!當然長遠嚟睇,電子書係一定有空間同市場,但係會唔會完全取代實體書,其實真係仲有一段好大嘅距離!雖然真係好耐無拎起個一本書去睇,因為真係無咁嘅時間去行書局,同時要搵嘅資料好多時都可以係網上面搵到,特登買一本書返去又好似好浪費!


Also published on Medium.

Comments are closed.