食蛋撻


個人分享
Tagged With: , , , , , , , , ,

「蛋撻」

蛋撻係香港地道食物代表之一!香港蛋撻分為酥皮同牛油皮兩款。係一九四零年代,香港高級西餐廳引入蛋撻,一九五零年代開始出現係茶餐廳。初時茶餐廳嘅蛋撻都比較大,一個蛋撻就可以成為一份下午茶餐。不過係一九九零年代開始,兼營包餅嘅茶餐廳逐漸減少,只有舊式嘅茶餐廳先至有自家製嘅蛋撻!大部份茶餐廳都係訂購蛋撻。香港多間蛋撻店馳名中外,旅客嚟到香港必定會嚐下香港嘅蛋撻。

「普查」

相信每個香港人都會食過蛋撻,但係每個人都有自己嘅喜好。識得食嘅就應該係食酥皮蛋撻!但係其實有好多人鍾意食牛油皮,只不過我覺得酥皮要整得好食係比起牛油皮難。點先知係一個好嘅蛋撻?啱啱較早前有一間香港嘅媒體就做咗個全港嘅蛋撻普查!講真真係佩服咗佢哋,因為真係超級認真!不論價錢,蛋撻皮嘅厚度,蛋漿嘅高度,蛋撻嘅重量同大小都將佢數據化咗,真係幾變態!

「數據」

當然對我嚟講數據係最吸引我嘅地方!之前有漫畫嘅數據,而家就係食物嘅數據。如果你問我對邊啲香港食物嘅數據最有興趣,咁就當然係菠蘿油同奶茶啦!因為要搵一個好嘅菠蘿油係好難,而奶茶亦都係一樣!所以如果有個全香港嘅菠蘿油同奶茶嘅普查,其實都幾得意!如果每年都做一次嘅話就更加好,因為可以知道每種食物嘅變化。而我最希望嘅係嚟啲數據可以變成公開數據,等更多嘅人可以用嚟做分析!

資料來源:
香港百撻圖


Also published on Medium.

Comments are closed.