搵拍檔


個人分享
Tagged With: , , , , , , , , ,

「拍檔」

好多人都會問點解我咁耐以嚟都唔搵個拍檔,又或者點解唔去搵投資者。其實原因好簡單,就係因為第一次創業係因為拍檔嘅問題,到最後不歡而散,朋友都無得做。而如果引入投資者,當然可以好快咁擴展業務,但係同時話事權少咗,仲要追數,以致影響公司本身嘅方向。所以到而家仲係無拍檔,無投資者。因此好多嘢都係為自己負責,好多嘢都係自己一力承擔。

「創業」

創業最佳嘅組合係由三個人形成,第一個係懂得推廣同銷售,第二個係懂得理財同營運,第三個就係懂得科技同編碼。當然有時可以係一兼幾職,只不過如果講效率嘅話其實好多時都會因為要兼顧太多嘢而大打折扣。當然有拍檔嘅好處就係有事嘅時候可以有多個人去商量,唔駛下下自己一個孭起晒。只不過搵拍檔比起搵老婆仲更加難,而有時就算你個拍檔幾好都好,其實仲有一日都有機會拆夥。

「尋找」

當然自己一個人有時候係幾孤獨,因為所有嘢都要自己面對。有時當然希望會遇到一個好嘅拍檔,但係咁多年都仲未遇到。真係實在有好多嘢想做,只不過一個人得一對手,再加上體能比起以前真係無得比,如果真係有機會遇到一個同路人嘅話就好啦!不過其實有同無,自己都已經習慣咗,只係希望自己可以再做多啲,做好啲,因為自己俾自己嘅期限到所剩無幾。


Also published on Medium.

Comments are closed.