人都癲

「數據」

數據真係一樣令人又愛又恨嘅嘢,因為如果好好利用嘅話係可以帶來好多機遇。只不過好多時啲多公司收集數據嘅方法同使用數據嘅原因真係會嚇你一跳。首先如果收集數據嘅時候無一個清晰嘅目的同框架,基本上都好肯定要浪費好多時間去整理數據先至可以分析。除此之外,好多公司只係為咗要應付老闆嘅要求,變相麻木地整理同分析所收集嘅數據,但係最後其實根本對業務一啲幫助都無。

「整理」

其實我好怕整理數據,因為絕大部份嘅時間都係要逐少逐少咁整理啲數據。未開始分析就已經要浪費好多時間,而有一啲問題係可以避免。雖然好耐無揼過石仔,但係最近幫一位客戶做報告嘅時候,因為某啲問題本來應該可以一兩日完成嘅工作,而家日搞夜搞都搞唔掂。而開始有啲嘢可以睇下嘅時候,竟然發現其實有啲地方係會白做,點解?因為根本上無嘢可以分析,真係人都癲。

「問題」

當然我知道個客嘅問題係邊度,而我亦都希望佢哋會進步,所以應該會比啲意見佢哋,如果唔係下次再有機會合作嘅時候就會再一次做死自己。過去嗰一個星期真係對數對到人都癲,除咗多要攞好多數字之外,最主要嘅係個客戶睇得太細而往往就係咁,好多結果都係空白一片。而當我見到無數據嘅時候,就開始質疑係唔係自己做錯嘢,只不過重複睇過有真係無問題,就係咁我就俾啲數字玩死咗。


Also published on Medium.

Comments are closed.