做樓奴


個人分享
Tagged With: , , , , , , , , ,

「買樓」

好多人死慳死抵都係希望可以買到樓,做個樓奴。因為一般做按揭嘅話都講緊最起碼二十五年以上,所以要供斷一層樓嘅話係需要用你一生三分之一嘅時間!如果由打工開始計,基本上一半嘅時間係需要將部份嘅收入拎去供樓。當然每個人都希望有一個安樂窩,但係大家有無諗過如果用香港一層樓嘅價錢,係其他國家你可以買到啲乜嘢屋?唔通香港人嘅人生只得一個樓字?

「樓奴」

絕大部份嘅香港人都希望可以買到樓,但係好多國際嘅研究都指出香港嘅樓,其實係全世界最難負擔同最貴嘅城市!但係點解個個都要買樓?而點解而家咁多人買唔到樓?當然當中有好多唔同問題同因素,只不過好多時買樓都係要睇彩數!而最大問題嘅係大部份人嘅人工同樓價基本上唔成正比,就算你嘅人工真係供得起層樓,而亦都通過壓力測試,但係你亦未必會足夠嘅儲蓄做首期。

「選擇」

經常大家都會見到啲報紙雜誌訪問啲好年輕就買到樓嘅人,但係香港有幾多嚟類人?佢哋嘅職業係啲乜?所以要買到樓,除非你咁好彩當年零三年沙士或者零八年金融風暴之後買咗層樓,因為你層樓今日真係分分鐘已經升咗三倍!咁無買到嗰啲人點算?而家啲後生又點算!其實對佢哋嚟講買樓係一個幾乎無可能達成嘅夢想!不過點都好,人生有好多唔同嘅嘢可以做,何必只係淨係做樓奴?


Also published on Medium.

Comments are closed.