金鐘站


個人分享
Tagged With: , , , , , , , , ,

「地鐵」

香港地鐵金鐘站應該會係地鐵網絡入面最繁忙嘅一個站,因為好多條線都要係金鐘轉車,包括來往九龍,香港南同遲啲嘅沙中線。其實金鐘站以前嘅通風真係好差,而家先叫做好少少,不過依家反而係因為人太多,基本上好多時連月台到無地方企。所以我其實好怕係啲繁忙時間搭地鐵,因為如果要係金鐘站轉車嘅話,基本上真係超級浪費時間。放工已經夠疲累,仲要迫餐懵先至上到車,真係無奈!

「金鐘」

相信好多人如果搭地鐵由九龍荃灣線去金鐘站轉車搭港島線嘅話都應該有一個非常難忘嘅經歷!一個等好多班車都上唔到嘅經歷,尤其係繁忙時間!真係分分鐘等十幾班車都未必上到車,就算你咁好彩上到車都迫到你傻咗。所以有啲人情願搭到去中環站再轉車,只不過越來越多人咁做,所以而家就連中環站都迫滿晒人。如果遲啲開埋沙中線嘅話咪仲大鑊?

「風險」

以前未有車同住係港島東嘅時候,好多時都會去尖沙咀接老婆放工,然後搭地鐵返港島。每次去到金鐘轉車都真係怕怕,因為真係多人到爆。所以當老婆懷孕之後,我都會送佢返工放工,因為真係怕啲人睇唔到佢。老實講地鐵不斷加價,但係服務質素又唔見得好咗,其實個站都已經負荷唔到咁多人流,唔通遲啲改建完會好啲咩?個站只會越嚟越多人,真係驚有日會發生啲大事件,咁就大鑊啦!

Comments are closed.