開市啦


個人分享
Tagged With: , , , , , , , , ,

「開市」

每年大家都想揀一日好日去開市。今年有啲話年初四,有啲話年初八,咁究竟係邊日呢。其實都係意頭嘢!擇個吉日開市都係想新一年事事如意,當然做老闆嘅都希望每年都可以大豐收。雖然每年都會睇下邊日開市好,但係而家網絡年代,好多時都無收爐嚟樣嘢,基本上好多人新年都要開工,所以無話開唔開市嚟樣嘢。如果要揀邊日開市嘅話當然唔係咁簡單啦,最起碼都要夾一夾自己嘅時辰八字先至得嘅!

「立春」

今日係「人日」再加上「立春」,所以特別有意思。雖然前幾日都已經開始工作,但係今日先叫做真正開市。其實邊日開市都無所謂啦,最緊要就係過咗今日就真係正正式式踏入雞年。新一年新開始,希望今年事事順景,開開心心就夠。今年淨係要專心做好一件事就已經足夠,重新由零開始做起。而今日香港嘅黃昏特別靚,因為明天會更好!

「人日」

其實點解初七係人日?點解係所有人嘅生日?根據漢代東方朔《占書》記載,農曆新年嘅首八天為人類和不同畜牧作物嘅生日,依次序為「初一係雞,初二係狗,初三係豬,初四係羊,初五係牛,初六係馬,初七係人,初八係穀。」至於另一個說法,就係女媧創蒼生,係做出雞、狗、豬等動物之後,第七人就創造出人,所以初七就代表所有人嘅生日嘞!


Also published on Medium.

Comments are closed.