許願樹


個人分享
Tagged With: , , , , , , , , ,

「林村」

林村許願樹係兩棵大榕樹。兩棵樹被當地嘅村民視為神靈,所以好多人會係其根部燃點香蜡燭冥鏹祈褔許願。後嚟有人製作寶牒,將姓名,出生年月日同願望寫係寶牒上。然後再附上百解符,貴人指引同祿馬衣等綁係個橙度,然後誠心參拜後同向樹許願後,就將份寶牒拋上樹幹!如果唔跌落嚟嘅話就代表願望可以成真。而早前榕樹有太多寶碟,多以受重而死亡,因此為咗保護榕樹,就整咗棵假嘅許願樹俾遊人許願,繼續林村嘅傳統!

「許願」

今日第一次去林村嘅許願樹,本來諗住避開公眾假期先去因為怕會好多人,點知原來好多人都仲放緊假。淨係塞車都差唔多塞咗一個鐘,然後差啲無位泊。去到村口之後就見到原本嘅許願樹已經加晒支架,而今日真係可以用人山人海去形容,因為新個棵許願樹真係俾人圍!圍住拋啲願望上棵樹到。講真啲假吉真係多到佈滿晒成棵樹,就算拋到上去都好容易跌返落嚟。

「寶牒」

雖然棵許願樹係假嘅,而寶牒就改為一個假吉綁住張許願紙。當然將寶牒拋上許願樹係無你諗得咁易,仲要唔跌落嚟真係幾難。況且而家個假吉無乜重量,可以話輕漂漂。所以今日都要拋咗幾次先至成功,反而老婆就一拋即中!其實拋寶牒都係意頭嘢,去見識下香港嚟嗰許願樹文化先至係真。不過都係建議大家唔好大時大節去,因為真係好多人,最好都係揀啲平日去!


Also published on Medium.

Comments are closed.