放霧霾


個人分享
Tagged With: , , , , , , , , ,

「煙花」

我其實好鍾意影煙花,真係有諗過連續影十二年,將十二生肖嘅煙花匯演都影晒。我有一年真係好早去到尖東海旁去霸位,但係真係好天曬落雨淋。不過如果講地點嘅話真係最近同最有利!影煙花真係好睇天氣,所以有時天氣唔好,雲層低,無乜風嘅話,影完第一輪之後基本上好多時都係影煙多。有時真係睇彩數,而之前影咗四年,印象中只有一年真係講得上天朗氣清。

「初二」

今日約咗屋企人上去我哋屋企諗住食雞煲打邊爐,然後睇煙花。不過由晏晝開始其實天氣唔好,落過雨,啲雲都有啲偏低,仲要有霧。所以今晚放煙花就預咗未必睇得到,因為放得高嗰啲應該都會俾啲雲遮晒。如果比著以前,我應該會去影煙花,但係今年應該係過去幾年最差嘅一年,因為以往好多影相嘅熱點都完全睇唔到,而且真係實在太大煙。所以其實唔係放煙花,而係放霧霾,因為放完煙花真係得返啲污染環境嘅煙。

「污染」

點解天氣唔好都要堅持放煙花?放咗都欣賞唔到嘅話,咁放呢為乜?有時真係諗唔明,唔通真係唔可以改期?最慘嘅係個贊助商,因為無啦啦燒咗八百萬,結果淨係放多幾放,得番啲煙。放煙花最忌嘅就係無風,因為放完之後啲煙吹唔散,尤其最後嗰幕因為一定係咁爆,而放煙花會做成嚴重嘅空氣污染。最終今晚煙花就冇得睇,但係霧霾就大把!


Also published on Medium.

Comments are closed.