買生果

「生果」

近幾年真係越嚟越多人去果欄買生果,而我大部份嘅時間都係去買士多啤梨,車厘子同水蜜桃。因為呢三樣嘢真係比較抵買,價錢一定比超級市場平,而且一定靚過超級市場嗰啲。所以識買生果嘅人都會去果欄買,當然亦有好多公司會係大時大節嘅時候去果欄買生果嚟送俾啲客!但係今年車厘子遇著農曆新年,真係多人到爆,今日去到基本上好多生果都已經賣晒!

「果欄」

又係一年一度去果欄買車厘子嘅季節,當然而家啲人越來越識食,唔係塔斯曼尼亞嘅車厘子都唔會買。今年啲價錢真係好誇張,上星期去果欄竟然一盒要七百幾蚊,足足比起上年貴成一倍!之後去到經常幫襯嗰間一問佢就話因為就嚟農曆新年所以啲生果俾人搶到貴晒。咁又係!今日終於再去睇下有無車厘子賣,見到一盒竟然只係二百五十蚊,所以就買咗兩盒返屋企!哈哈!

「好彩」

今日真係好好彩因為去到嘅時候老闆娘已經話無乜車厘子剩,遲啲嘅話都無份。當然因為太多人基本上都無可能睇下盒車厘子靚唔靚,真係講過信字!不過返到屋企一打開,粒粒都大過個五蚊銀。而最緊要係乜?當然就係二百五十蚊一盒,計返條數大約五十六蚊一磅!講真超級市場啲流流車厘子都係差唔多價錢。其實我哋一家人邊度識得晒兩盒車厘子,但係真係好平而且之後新年,所以可以用嚟招呼朋友!


Also published on Medium.

Comments are closed.