估唔到

「政治」

近排真係講好多關於政治嘅嘢,不過真係日日新鮮。當然好多人而家嘅焦點都係放咗係兩個司長身上,一個真係估唔到咁離地,就連八達通都唔知點用,屋企無廁紙但係又唔知便利店無,甚至乎今時今日連一個社交網站嘅專業都無嘅人,講真離地到一個地步你會質疑點解佢可以做政務司司長。仲話佢嘅職責係解決民生事宜,長遠規劃社會基建,以及制定人口政策。如果佢做特首嘅話,可想而知會有幾大鑊!

「森美」

今日最估唔到嘅係薯片叔叔竟然可以搵到森美做佢其中一位支持者,而且仲幫佢拍咗一條三分鐘嘅短片。好多人都知道曾俊華背後嘅團隊真係好勁都背後嘅高人係邊個。但係點勁都好,你要一個係香港無人不識,兼且咁有名嘅金牌司儀,仲要從來唔會高調表態自己政治取向嘅人去做佢嘅支持者,嚟個先至係最估唔到嘅位。森美喎!真係諗都冇諗過佢會咁高調撐薯片叔叔,可想而知佢哋嘅關係有幾好!

「民意」

雖然香港仲未係一人一票選特首,而森美嘅影響力未必可以影響嗰班選委,但係點解仲會搵森美去支持自己?原因好簡單,就係延續佢貼地嘅路線。當然反對曾俊華嘅人大把,但係由一個學生嘅角度去話俾大家知佢眼中嘅特首候選人係點樣,我相信大家睇完都會覺得有說服力。社會依家咁兩極化,可以話係上一代與下一代之間嘅分歧!正正呢個原因,森美嘅影響力就係年輕嘅一輩,而其實要影響選委以外嘅人其實難度更加大。希望今次嘅特首選舉民意可以幫到薯片叔叔啦!


Also published on Medium.

Comments are closed.