新街市


個人分享
Tagged With: , , , , , , , , ,

「長發」

唔知大家仲記唔記得之前青衣長發街市係完全無知會下,領展將個營運外判咗俾另外一間公司。之後就係租約期滿之前話會收返啲鋪頭,重新裝修。而當時好多店主都唔知佢哋會用乜嘢價錢去租啲鋪頭比佢哋。所以有啲就決定索性唔做,有啲就搬咗去第二度,而有機多仲留低就真係無人知。而上個星期終於裝修完,重新投入服務,但係就唔知點解由長發街市改名變咗做青衣市場。

「重開」

經過幾個月嘅裝修,長發街市終於重開,只不過啲裝修真係好誇張!無啦啦係中間整個大螢幕扮魚缸,真係多舊魚。入到去嘅感覺真係好似大型嘅超級巿場,唔講真係唔知係街市。行咗兩行之後,真係覺得唔好行,啲嘢好似俾以前少咗,價錢亦比以前貴咗。講真用咁多錢搞咁多嘢真係同週邊嘅環境格格不入,而且附近都係屋邨為主,但係入面竟然有鋪頭賣和牛,唔通個個都係隱形富豪?

「街坊」

最慘嘅係,入到去無咗嗰種街坊嘅感覺。係或者地方係乾淨咗,賣啲嘢可能靚咗,但係話明係街市,咁又點可以同一啲高檔嘅超級市場比較呢?就算希望將街市轉型,老實講飲食係所有人嘅基本需要,無啦啦用幾千萬去裝修,你話啲租金無加就一定無可能。其實個街市仲有鋪頭未租出,而有晚我去買嘢嘅時候,竟然見到一碗「碗仔翅」竟然要三十蚊!當時我以為我睇錯,但係真係三十蚊碗,真係痴咗線!


Also published on Medium.

Comments are closed.