麥樂雞

「老麥」

我都幾相信好多人同我一樣都鍾意食麥當勞哋嘅麥樂雞。唔知由幾時開始,一唔知食啲乜嘢嘅時候就會自自然然叫咗麥樂雞。不過係香港嘅麥樂雞只有六件同九件兩個選擇。仲記得以前係澳洲返夜班嘅時候,因為放工已經係十點打後,要醫肚嘅話都無乜選擇,所以麥當勞係其中一個選擇。而通常我一叫就叫二十件麥樂雞!係呀,澳洲係有二十件麥樂雞嗌㗎!不過相信依家自己未必一個人食得晒。

「十蚊」

你今日有無去麥當勞買十蚊一盒九件麥樂雞呢?係呀,十蚊一盒呀!其實之前麥當勞都有推出過相同嘅優惠,不過今次自己都有去買咗三盒返屋企。梗係啦,唔好執輸嘛!當然無諗過咁多人去買,真係《雞,全部都係雞,全部都係雞,全部都係雞,全部都係雞》,而我最多見到有人一買就買十盒,即係九十件雞,認真誇張!當然你亦都會見到平時用嚟炸薯條部機都用咗嚟炸麥樂雞!

「誇張」

其實今日啲人都真係好誇張,真係好似前從來無食過麥樂雞咁。好多麥當勞都排晒長龍,而好多人都住起碼買兩盒麥樂雞。不過除咗今日嘅優惠之外,其實之後麥當勞都有其他嘅十蚊優惠,唔知之後會唔會好似今日咁誇張。講真依家十蚊可以買到啲乜嘢?聽日十蚊可以買到兩個漢堡包,基本上等於買一送一。唔知聽日又會唔會有咁多人排隊呢?不過今日我都係因為個十蚊優惠係麥樂雞我先至去買!


Also published on Medium.

Comments are closed.