聖誕夜

「聖誕」

去完旅行真係好鬼累,尤其係郭大少,今朝瞓醒食完奶玩咗陣無幾耐又瞓過。之後等佢起身食完嘢,大家就準備出去玩同食聖誕大餐。首站就係同郭大少去睇佢其中一個至愛,就係火車!真係好多人都鍾意嗰個火車頭,所以知道某商場有展覽就當然帶佢去睇啦。之後就去咗食飯,不過真係再一次證明聖誕節係唔應該出街食飯,因為如果用同樣嘅價錢,我真係可以買到好多嘢自己整。不過真係好累,所以先至出去食。再一中伏!

「影相」

今年時間真係過得快,話咁快又到咗聖誕節,仲有幾日又一年。上年聖誕節郭大少先至得嗰五個月大,睇返啲相真係好鬼得意。今年佢就真係識行識走,想同佢影張相真係好鬼難,因為佢見到啲嘢就周圍走無時停,所以今年都仲未有一張靚嘅聖誕相。不過下年都係辛苦啲自己係屋企整聖誕大餐!人大咗真係嘛嘛哋人多嘅地方,本來諗住食完飯一家大細去沙田新城市廣場影燈飾,但係真係太多人,所以好快就走咗。

「老人」

其實聖誕節最開心嘅就當然係小朋友啦,因為聖誕節一定有禮物收嘛!不過郭大少好驚啲聖誕老人,不過只限啲真人扮嗰隻!真係唔知點解佢咁驚,因為之前諗住同佢影相,點知行埋去之後就驚到攬實我叫我走。嚇到個聖誕老人都唔知俾啲乜嘢反應好,不過有時真係估唔到佢,因為佢有啲嘢真係好大膽,但係有啲嘢又好鬼細膽,真係好難捉摸。希望郭大少今個聖誕過得開心,而出年可以企定定咁俾我影返啲相啦!


Also published on Medium.