的士佬


個人分享
Tagged With: , , , , , , , , ,

「的士」

其實點解好多人都唔鐘意搭的士?原因好簡單,因為態度唔好,經常性拒載,坐車重要帶埋路,經常危險駕駛,揸車好似揸船咁,等等。而好多時我坐的士都坐到暈,就算自己揸開車到坐到作嘔。有陣時坐車仲要睇人面色或者俾晒說話你聽。而自己揸車嘅時候就一定非常小心啲的士,因為佢哋真係亂咁嚟,真係撞咗都唔知乜嘢事。當然唔係個個的士司機都係咁,不過十個都有八個。

「司機」

唔知大家今日有冇留意到有一段新聞關於一個的士司機將一個媽媽係搭車期間餵哺母乳嘅片段上載上網!睇到之後真係好嬲,其實關你乜嘢事,就算係都唔應該將條片放上網。而家係咩嘢年代,餵哺母乳係好正常嘅事,連簡單嘅尊重都無。其實佢知唔知道餵母乳有幾辛苦?嚟啲人真係要拖出去打!啲人真係離晒譜,香港好多地方已經唔夠設施,依家仲要俾人偷影兼且擺上網,真係人神共憤!

「私隱」

講真啲的士成日話加價,但係服務嘅質素就每況越下。依家仲話要係的士車廂入面加監控設施,以便控制質量。如果好似單新聞咁基本上坐的士無晒私人,真係唔知幾時會俾人監控。如果係要提升服務其實仲有好多方法,所以有必要監聽同錄影咩?如果係咁我相信好多人都選擇唔搭的士,因為基本上會毫無私隱可言!所以佢哋話人哋搶咗佢哋啲生意,其實係唔係應該先檢討自己先呢?


Also published on Medium.