好學校


個人分享
Tagged With: , , , , , , , , ,

「長短」

每個人十隻手指都有長短,所以每個人都有自己嘅長處同短處。係香港每個家長都好緊張自己仔女嘅成績,雖然大家把口就話求學不是求分數,只不過其實好多時咪又係好介意分數。講到尾其實係教育體制嘅問題,因為學生嘅成績係同分數掛鈎。如果真係有學校真係唔係用分數去量度學生嘅成績嘅話,我相信好多學生同家長都會好開心,只不過就算學校唔求分數個教育機制求分數,所以到最後都好似無得揀!

「學校」

一間好嘅學校當然先要有一個好嘅校長,然後就當然要有好嘅老師。其實小朋友成長嘅時候,大部份嘅時間都係校園入面,所以除咗家長係屋企教導小朋友之外,學校係好緊要。但係一間學校有無可能照顧到每一位小朋友,而且有空間去發掘每一個小朋友嘅長處。當然學校唔應該只係得一把尺去釐定學生嘅好與壞,因為教育嘅原意係培養唔同嘅人才,如果只係用讀書嘅成績去衡量嘅話,好多時就會無法將佢哋嘅天賦展現出嚟!

「平台」

其實唔單止係學校需要有一個平台令小朋友發揮佢哋嘅長處,係商業嘅環境亦都係一樣。如果無足夠嘅空間俾佢哋去發揮,好多時就會埋沒佢哋嘅能力。千里馬都需要伯樂,其實我好相信嚟句說話,只不過唔係每個人都有咁嘅運氣會遇到佢哋嘅伯樂。雖然唔知自己有無遇過,但係好肯定嘅係自己唔係讀書嘅材料,而慶幸咁多年都仍然可以做到自己鍾意嘅工作,同時亦有足夠嘅空間同機會去發揮自己嘅所長。


Also published on Medium.