十六個


個人分享
Tagged With: , , , , , , , , ,

「長大」

小朋友真係打得好鬼快,唔覺唔覺又一個月,唔覺唔覺就十六個月大。郭大少越嚟越有自己嘅主見,佢所有嘢都好清晰咁話俾我哋知佢要啲乜。只不過佢仲未識得講嘢,所以有時我哋唔知佢講乜嘅時候,佢會好忟憎我哋唔知佢要乜。今個月佢又成長咗唔少,不過就病咗成個星期,真係擔心死我哋。而今個月開始多咗幼稚園面試,雖然仲未係我哋心儀嘅幼稚園,相信到時我哋會仲緊張。

「馬騮」

上年今日嘅郭大少仲未識行識走,依家就已經係一隻甩繩馬騮。佢食嘢啲口味真係一期期,有時鍾意食螺絲粉,有時鍾意食烏冬,有時鍾意食香蕉,有時鍾意食藍莓,不過始終無變嘅就係雞蛋同提子。依家佢開始講多咗嘢,見唔到我就叫阿爸,見唔到老婆就叫阿媽。依家日日要聽歌,聽到音樂就會自自然然做動作。佢有時以為自己已經大個仔,樣樣嘢都想自己嚟。而家有時仲會好冧咁錫我哋,小朋友真係大得快!

「幸福」

郭大少真係一個好心急嘅人,做遲少少都唔得。自己鍾意食嘅嘢就塞晒落個口入面好似一隻松鼠咁!不過佢嘅記性真係好好,佢認嘢都唔錯,只要去過嗰個地方佢都記得。其實真係無嘢望,淨係希望佢繼續健健康康,繼續佢一貫樂天嘅性格。當然如果可以坐定啲,食多啲嘢,咁就好啦。睇住佢一日一日長大,就算辛苦啲都無所謂。有時見到佢拖住老婆個背影,真係覺得好幸福。雖然自己未必做得好好,但係見到佢哋兩個開開心心就得!


Also published on Medium.

Comments are closed.

 
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Also published on Medium. Click to share on Facebook [...]
  • 放閃日其實放閃係一個網絡嘅用語,主要係用嚟形容啲人係網上面炫耀自己。當中用得最多嘅係情侶之間互相公開自己嘅幸福同快樂,尤其係一啲單身人士搵到伴侶之後不斷發放相片炫耀自己嘅幸福。好多人會用閃光彈嚟形容,而回覆嘅通常係帶上黑超嘅表情符號,因為閃光彈好刺眼,所以要帶返副黑超擋一下啲耀眼嘅光芒!所以每逢情人節好多人都會通過唔同嘅渠道放閃! Also published on Medium. Click to share on Facebook [...]
  • 數據先好多公司都會有唔同嘅數據,但係到最後仍然解答唔到一啲商業上嘅問題。原因其實唔係出於數據,而係無人去設計點樣收集數據。就算有數據都唔知啲數係啲乜嘢情況下收集返嚟。最終導致啲數據無法解釋日常業務嘅問題!可多公司都低估咗收集同分析數據所需要嘅人力以及資源,通常都係到咗分析嗰一刻先至發現問題。所以點樣收集數據係緊要過點樣分析數據! Also published on Medium. Click to share on Facebook [...]
  • 被截停當然警察如果遇到或者發現可疑嘅車輛係有權利去截停佢,但係只不過如果因為要截停可疑嘅車輛所導致嘅傷亡係唔係有必要呢?其實係好幾年前香港警察曾經截停路面嘅私家車做路障,希望截停可疑車輛而導致安份守己嘅市民有性命財產嘅損失。而近日亦有類似「人肉路障」嘅事件發生,今次就導致兩死五人受傷。老實講點解要市民用自己嘅性命同財產去幫你截停可疑車輛先? Also published on Medium. Click to share on Facebook [...]