低調啲


個人分享
Tagged With: , , , , , , , , ,

「高調」

每個人一生都會遇到一啲人好高調咁話自己有幾叻,有幾勁,而當中有啲人確實係勁嘅。但係當中亦有啲係吹水唔抹嘴,認屎認屁嘅人,簡稱魚目混珠,混水摸魚嘅人。最慘嘅係好多人係唔識分辨嚟啲人,如果再加上傳媒廣泛報導,某部份嘅人慢慢就會被繼續塑造成有影響力嘅人。所以高調唔代表一切,因為好多時只係虛有其表,得表面嗰層,到落手落腳做嘅時候就真係見真章嘅時候。所以通常叻嘅人唔會話自己叻,而且佢哋都非常低調。

「成功」

好多時越成功嘅人就會越低調,因為成功唔係自己話自己成功就得,而係其他人亦都認同你先至係成功。所以好多時高調嘅人唔代表佢哋叻啲,成功啲,而係佢哋享受被人關注嗰種感覺。有陣時有啲人係會刻意製造假象令其他人覺得佢好成功,而因為佢哋高調嘅原因,所以就會有好多人認識。咁多人識就等於成功?不過現實就係咁,社會覺得某個人成唔成功好多時都只不過因為佢哋嘅暴光率高,而大部份嘅時間好多默默耕耘嘅人就被忽略。不過唔緊要因為佢哋大多數都鍾意低調!

「性格」

有時做一個高調嘅人其實亦都可難,因為當你有好多目光專注喺自己身上嘅時候,做任何嘢都要諗過度過先至去做,有時甚至乎只要做咗一件令大家反感嘅事就足以抵銷你之前所做嘅一切。當然高調嘅好處就當然係越多人認識,你所發表嘅言論都會有一定嘅影響性,有時亦都因為咁而認識到好多唔同嘅朋友亦帶來唔同嘅機會。所以高調有高調好,低調有底調好,到最後都係睇個人嘅性格,事關唔係個個都鍾意備受關注。


Also published on Medium.