炒栗子

「栗子」

炒栗子被古人稱為「灌糖香」,有詩云:「堆盤栗子炒深黃,客到長談索酒嘗,寒火三更燈半灺,門前高喊灌糖香。」據《遼史》記載,早於遼代王室(公元九百一十六年至一千一百二十五年)就已經有專門嘅栗子園同專人烹製糖炒栗子。而通常炒栗子係用長鐵鏟將大黑鑊入面栗子同黑沙上下翻炒,栗子係黑沙堆中翻滾,然後撒上砂糖。栗子炒至五成熟就以鐵篩撈起,篩走黑沙就搞掂。而家有啲人就會用專門嘅機器嚟炒栗子。

「冬天」

每年一到咗冬天,我相信大家都會聞到一陣陣嘅香味!咩嘢味?未就係炒栗子味囉!真係見到都想買嚟食,因為冬天凍冰冰,啲栗子暖笠笠。而每當你見到炒栗子嘅同時一定會有鵪春蛋賣。但係點解炒栗子要配鵪春蛋就真係唔知。仲記得以前細有時啲栗子檔係地鐵站出口,但係啲栗子味係地鐵站都聞到,真係好鬼香。不過唔係次次都好食,有時啲栗子都好一般般,真係要睇下彩數。不過冬天買一包邊行邊食又真係幾過癮嘅!

「小販」

其實而家要搵到炒栗子檔真係好鬼難,唔係話你想食就食,因為佢哋有時真係開得嗰幾個鐘頭檔。當然你可以話自己買栗子返屋企炒咪得囉,但係就無咗係街到食嗰種感覺。所以如果你鍾意食嘅話,見到就好買啦,因為真係未必俾你咁容易遇到。雖然有時係其他地方都會見到有炒栗子,但係我最終覺得香港嗰啲小販推住架車嗰種先至有風味。成個感覺同味道都唔一樣,希望到郭大少大啲嘅時候可以同佢兩父子一齊剝栗子啦!


Also published on Medium.

Comments are closed.