有可能


個人分享
Tagged With: , , , , , , , , ,

「態度」

好多時做人做事都要有一個正面嘅態度,如果樣樣嘢一開始就已經抱住玩玩下嘅心態,又或者覺得無可能做到嘅話,其實從一開始你就已經無可能成功!如果你睇返人類嘅歷史,通常啲人話唔得嘅嘢通常到最後都係顛覆社會嘅嘢。所以所有嘢都係有可能發生,只要相信自己嘅能力,不斷嘗試,唔好放棄,就算到最後失敗,都唔緊要。因為係過程中你會有唔同嘅得著,而失敗係成功必經嘅階段。

「可能」

依家遇到好多年輕人都會講「無可能」嚟三個字,但係佢哋講「無可能」之前佢哋其實係未嘗試過做唔做到。當然好多嘢係唔可以格硬嚟,但係試都未試過嘅話就真係有啲問題。好多時我都唔相信無嘢係做唔到,只係你肯唔肯去嘗試,因為只要嘗試就有可能。雖然有啲人會覺得你鬥氣,但係其實只不過係對自己嘅要求。就算到最後真係做唔到,最起碼自己嘗試過,盡咗自己最大嘅能力。當然嗰啲一開始睇死你嘅人就會跳出嚟講風涼話。

「能力」

我由細到大都係相信自己嘅能力,當然自己係有啲好勝,所以好多人覺得我唔得嘅嘢我都會盡力去做。就好似中學嘅時候,個個話唔好讀藝術,亞洲人讀藝術成績一定唔好,但係偏偏我成績就好好。唔讀書無學位就好難搵工,但係偏偏就入咗大公司做嘢。係香港做數據分析好難,但係偏偏我係香港做咗數據分析咁多年。所以話無嘢係無可能,只係自己嘅信念有幾強,唔怕失敗,繼續嘗試,仲有一日你係會成功!

(Visited 50 times, 1 visits today)

Also published on Medium.