踩單車

「單車」

其實唔知大家有冇留意過我個網誌係用咗一架單車嚟到做網誌嘅標誌,點解?原因係非常簡單不過,因為其實我好鍾意踩單車。不過自從離開咗澳洲之後真係冇乜機會踩單車,而係香港踩單車我真係覺得幾危險。一來香港嘅路真係連揸車都覺得佢好爛,第二香港啲人揸車係唔會讓啲單車,第三香港可以踩單車嘅地方非常少,第四香港啲屋真係好細好難搵到位放架單車。所以真係無踩單車太多年,相信自己嘅體能應該踩得唔遠。

「危險」

香港踩單車嘅危險程度真係好高,尤其係踩公路。好多時啲車係唔會讓啲單車,有時都會見到好多危險嘅情況出現。而因為香港無乜地方適合練車,而有啲人又偏偏鍾意去啲危險路段練車,好多時意外就會發生。唔知大家有無留意到有一篇新聞因為一家私家車係九龍灣啟德郵輪碼頭對開越線爬頭,點知有三部單車迎面而來,造成一死兩傷。如果大家經常去一啲多單車嘅地方其實真係要十分小心,因為大家都係道路使用者。

「意外」

雖然我真係幾鍾意踩單車,但係每次見到啲人揸車或者踩單車都感覺好危險。踩單車嘅好多都無安全意識,當然經驗老到嘅會好好多,但係好多時見到啲單車友為咗啖氣而同啲車鬥氣。講真有意義咩,到最後真係皮包骨,有起事上嚟真係好蝕底。而嗰啲嫌啲踩單車嘅人阻住條路,其實人哋都有道路使用權,所以就算要爬頭都應該要小心,如果速度太快有可能啲氣流會導致踩單車嘅人士失去平衡釀成意外。所以大家都應該要互相尊重同忍讓,咁就唔會發生意外啦!


Also published on Medium.

Comments are closed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Also published on Medium. Click to share on Facebook [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Also published on Medium. Click to share on Facebook [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Also published on Medium. Click to share on Facebook [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Also published on Medium. Click to share on Facebook [...]