飲飲酒


個人分享
Tagged With: , , , , , , , , ,

「美酒」

每年我同老婆都會去一年一度嘅美酒佳餚節,而前年去嘅時候都仲未知道有咗郭大少,去年因為郭大少只係出咗世三個月所以無去,今年當然要去飲飲食食啦!不過每年都係超多人,而且入到去除咗要門票之外仲要品酒券,當然飲酒就要酒杯啦所以如果你無自備嘅話都要平平地買隻膠杯仔。不過最貴嘅其實唔係啲酒而係入面啲嘢食,真係是是但但都要你三四百蚊,重要大部份係唔飽兼唔好食。所以可以嘅話真係自備嘢食會好啲!

「飲酒」

由細到大其實除咗紅酒同伏特加之外其實無乜話有啲乜嘢酒我係特別鍾意飲。就算係紅酒我大部份嘅時間都係澳洲紅酒為主。其實紅酒係好似咖啡咁,每個人嘅喜好都唔同。不過近排唔知點解鍾意飲梅酒多啲,或者飲落真係唔太似酒,而且唔駛一開就要開一支。除非有朋友一齊飲,如果唔係平時得自己兩公婆飲真係無可能飲得晒一支紅酒,到最後浪費就唔好啦。咁多種酒我最憎嘅應該係中國白酒,因為飲完之後嗰種味道真係有啲難頂。

「不足」

去美酒佳餚節當然係要同多啲人去先至開心,而過去都會去試下酒,買下酒。不過每年都係好多人,基本上唔早啲去霸位嘅話係一定無位坐,要企足全晚,你都咪話唔累!最慘嘅係過去咁多年都係無乜改進,排隊排到傻咗,今年連草地都無埋,真係搵個地方坐都無!雖然今年用咗套新嘅品酒券系統,好似方便咗,而嘢食方面都好似多咗。至於酒嘅種類亦都多咗,唔似得以前咁單調。其實我同老婆都好怕多人,所以都要諗諗出年仲會唔會去。


Also published on Medium.

Comments are closed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Also published on Medium. Click to share on Facebook [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Also published on Medium. Click to share on Facebook [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Also published on Medium. Click to share on Facebook [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Also published on Medium. Click to share on Facebook [...]