我唔識


個人分享
Tagged With: , , , , , , , , ,

「成功」

由細到大好多嘢我都唔識,好多嘢都係自學,當然因為我好想學而好多時都無人會教我,所以到最後都係靠自己。就好似游水同踩單車咁,如果你自己都唔想識,其實永遠都唔會識。講到尾就係有無興趣,如果無興趣真係乜都假。正所謂世上無難事,只怕有心人,如果一句話唔識,咁好多嘢都唔會成功。一次唔得唔緊要,最緊要係你知道一次失敗係為下一次成功嘅開始!

「唔識」

其實近一年聽得最多嘅幾個字就係「我唔識」嚟三個字!但係人一出世嘅時候本來就係乜嘢都唔識架啦,好多時唔識唔緊要,最緊要去學,甚至乎用多幾倍嘅時間去學。當然總會有一啲嘢係學唔識,不過唔緊要,最起碼唔好一嚟就話我唔識。有時唔識唔係大晒嘅,最緊要係有一種肯學嘅心態。尤其而家網絡發達,好多嘢其實真係可以上網自學,只係你有無心學!

「環境」

有時唔識唔係罪,但係依家好多人都以為一句唔識就可以唔使做,不過其實咁就會俾人覺得你唔夠進取。如果你真係唔識但係只要你有心去學,去解決問題,其實就已經足夠。或者依家嘅新世代實在太過幸福,成長係一個溫室嘅環境,好多嘢都會有人係身邊幫佢哋。有時學多啲嘢係無壞,因為你唔知幾時可以幫到你,學多啲野真係無壞。書到用時方恨少,事非經過不知難!


Also published on Medium.

Comments are closed.