莫議員

「選舉」

今屆嘅立法會選舉真係好緊張,而當然我最關心嘅係莫乃光可唔可以連任。因為之前無啦啦多咗好多選民加入嚟個界別,而且係投票嘅前夕不斷俾人抹黑。當然自己可以做嘅嘢唔係太多,最多都係叫啲人去投票。今次唔單止係捍衛業界,而且為咗香港嘅將來。所以無論如何都唔希望失去一個咁盡責嘅議員係立法會為我哋業界同香港人發聲!

「恭喜」

恭喜莫乃光議員成功連任!真係好緊張,因為昨晚做好所有嘢,安頓好屋企之後,就去咗中央點票站希望可以支持佢。不過因為今次有幾個投票站大排長龍,所以點票嘅時間亦延遲咗,而一心希望可以係會場支持佢,但係今日有嘢要做所以遺憾地無辦法等到點票完畢。不過結果係最緊要,而且仲要多對手近三千票。多謝有份投票嘅資訊科技界嘅選民!

「證明」

好啦今次我哋嘅工作又完成啦,之後就要靠莫乃光議員繼續為我哋業界發聲,希望嚟緊嘅四年可以再一次證明俾大家睇我哋嘅選擇係正確嘅!今次嘅選舉雖然多咗好多選民,而投票率亦超過八成,所以今次嘅結果好有代表性就係大家都相信佢嘅能力,唔係只係得個講字!雖然大家都擔心今次選舉嘅結果,不過數字已經講出一切!好好休息啦,之後辛苦你啦!

(Visited 52 times, 1 visits today)

Also published on Medium.